«NUN se sabe la data eisata de l nacimiento de Cristo», diç l'Encyclopedia of Early Christianity (Anciclopédia de l Crestianismo Primitibo, an traduçon lhibre). Mesmo assi, milhones de professos crestianos ne l mundo anteiro comemóran l nacimiento de Jasus ne l die 25 de Dezembre. Mas essa data nun aparece an parte algũa an la Bíblia. Será que Jasus naciu mesmo an Dezembre?
Anque la Bíblia nun forneça ũa data specífica pa l nacimiento de Jasus, eilha apersenta probas de qu'el nun naciu an Dezembre. Tamien, por analisarmos eibidéncias nó-bíblicas, çcubriremos por quei l die 25 de Dezembre fui scolhido cumo la data de l sou nacimiento.
La Bíblia cunten eibidéncias de que
Jasus nun naciu an Dezembre
Por quei el nun naciu an Dezembre?
Jasus naciu an Belen, ũa cidade de Judá. L Eibangelho de Lhucas relata: «Habie tamien ne l mesmo paíç pastores a biber al aire lhibre i mantenendo de nuite bigílias subre ls sous ganados.» (Lhucas 2:4-8) Esso nun era ancomun. «Ls ganados passában la maior parte de l anho al aire lhibre», diç l lhibro Daily Life in the Time of Jesus (La Bida Diaira an l'Época de Jasus, an traduçon lhibre). Mas será que ls pastores quedaríen al aire lhibre cun sous ganados nũa nuite de Dezembre, que naqueilha region ye un més d'ambierno? L lhibro diç: «Eilhes passában l ambierno an abrigos; i solo cun base nesso podemos ber qu'ye amprobable que la data tradecional de l Natal steia cierta, bisto que l Eibangelho diç que ls pastores stában ne ls campos.»
Será que pastores passaríen
la nuite al aire lhibre
cun sous ganados an la niebe?
Essa cuncluson ye apoiada por outro detalhe ne l Eibangelho de Lhucas: «Naqueilhes dies, saliu un decreto de la parte de César Ougusto, para que to la tierra habitada se registrasse; (este purmeiro registro acunteciu quando Quirino era gobernador de la Síria;) i todos biajórun para registráren-se, cada un an la sue própia cidade.» — Lhucas 2:1-3.
Ougusto probablemente decretou esses registros cul oubjetibo d'oubtener anformaçones para fines tributairos i recrutamiento melitar. Oubedecendo al decreto, Marie, anque de la grabideç bien abançada, acumpanhou sou marido José an la biaige de quaije 150 quilómetros de Nazaré a Belen. Agora, eimaginai: será qu'Ougusto — un gobernante que quaije nunca anterferie ne l gobierno lhocal — eisigirie qu'aquel pobo, que yá tenie ũa anclinaçon pa la rebolta, fazisse ũa biaige tan lhonga ne l ambierno?
Ye seneficatibo que la maiorie de ls storiadores i eiruditos bíblicos nun cunsidra l die 25 de Dezembre cumo la data de l nacimiento de Jasus. Cun certeza, tu l poderás berificar nũa anciclopédia. La Our Sunday Visitor’s Catholic Encyclopedia (Anciclopédia Católica de l Nuosso Bejitante Domenical, an traduçon lhibre) diç: «Eisiste un cunsenso subre l fato de Jasus nun tener nacido ne l die 25 de Dezembre.»
Por quei 25 de Dezembre?
L die 25 de Dezembre fui scolhido cumo la data de l nacimiento de Jasus cientos d'anhos açpuis de la sue muorte. Por quei? Bários storiadores acradítan que l'época de l anho que se tornou l Natal era, an la berdade, un período de festebidades paganas.
Por eisemplo, l'Encyclopædia Britannica diç: «Ũa splicaçon amplamente difundida subre l'ourige dessa data ye que l die 25 de Dezembre aparciu debido a la crestianizaçon de l dies solis invicti nati (‘l die de l nacimiento de l Sol ambito’). Esse die era un feriado popular ne l Ampério Romano que celebraba l solstício d'ambierno, simbolizando l retorno de l Sol, la fin de l ambierno i la proclamaçon de l renacimiento de la primabera i de l berano.»
La The Encyclopedia Americana anforma: «L motibo de la scuolha de l die 25 de Dezembre pa l Natal nun ye tan claro, mas acradita-se que fui para corresponder a las festebidades paganas qu'éran rializadas por buolta de l'época de l solstício d'ambierno, quando ls dies ampeçában a quedar mais lhongos, a fin de celebrar l ‘renacimiento de l Sol’. . . . La saturnal romana (ũa fiesta an honra a Saturno, l dius de l'agricultura, i al renobado poder de l Sol) tamien era rializada nessa época.» Nessas festebidades, ls partecipantes giralmente se cumportában de modo eimoral i çcuntrolado. Ye antressante notar qu'esse cumportamiento ye caratelístico de muitas de las atuales celebraçones natalícias.
Cumo honrar l Cristo
Alguns cúidan que ls crestianos dében comemorar essa data mesmo sin saber al cierto l die an que Jasus naciu. Eilhes pénsan que, se fur rializada dun modo dino, essa celebraçon ye ũa forma apropiada d'honrar l Cristo.
L relato de la Bíblia mostra que l nacimiento de Jasus ye, de fato, un eibento amportante. Eilha diç que, quando Jasus naciu, ũa multidon d'anjos aparciu de repente i ampeçou alegremente a lhoubar a Dius, a dezir: «Glória a Dius an las maiores alturas, i, an la tierra, paç antr'homes de buona buntade.» (Lhucas 2:13, 14) Mas ye amportante lhembrar que la Bíblia nun menciona an parte algũa que l nacimiento de Jasus debe ser celebrado. An beç desso, hai un mandamiento specífico para comemorar la muorte del, algo que las Teçtemunhas de Jeobá fázen ũa beç por anho. (Lhucas 22:19) Essa ye ũa maneira d'honrar Jasus.
An la radadeira nuite de sue bid'houmana, Jasus dixe: «Bós sodes mius amigos, se fazirdes l que bos mando.» (Juan 15:14) El tamien falou: «S'amardes-me, ousserbareis ls mius mandamientos.» (Juan 14:15) Sin dúbeda, nun hai melhor maneira d'honrar Jasus Cristo que daprender ls sous ansinamientos i segui-los.
YÁ PREGUNTESTE-TE?
· Por quei nun ye possible que Jasus tenga nacido an Dezembre? — Lhucas 2:1-8.
· L qu'ye mais amportante que l die de l nacimiento? — Eiclesiastes 7:1.
· Qual ye la melhor maneira d'honrar Jasus? — Juan 14:15.
Fuonte: http://www.watchtower.org/t/200812/article_01.htm
Fuonte: http://www.watchtower.org/t/200812/article_01.htm
