'Que trema l stádio!'. Cun este slógan ouriginal, la Federaçon Catalana de Futebol apersentou ouficialmente esta manhana an la Sala Paris de l Camp Nou, Catalunha, l jogo de la próssima terça-feira, die 22 de Dezembre, a las 20:30h, ne l Stádio. Las antradas custaran antre 15,00€ i 30,00€ cun çcuntos para colaboradores i grupos de la Plataforma (puodes cunsultar-lo eiqui).
A la cerimónia assistírun: Jordi Casals, persidente de la Federaçon Catalana de Futebol; Johan Cruijff, selecionador nacional catalan; Anna Pruna, Secretaira Giral de l Çporto; i Roberto Mori, cónsul de l'Argentina an Barcelona.
Johan Cruijff splicou que fazerá ua cumbocaçon "curta i culs melhores pa la ressonáncia mundial que tenerá i l potencial de l ribal". Cruijff spera jogar "cumo l Dream Team ó cumo l Braça de Pep, que you tamien gusto muito".
L astro houlandés cunsidera que la "Catalunha ten un einorme potencial futebolístico. Solo hai que ber la seleçon spanhola, formada la metade por catalanes. Esso te permite fazer ua eideia de l buon trabalho que poderíemos fazer nun Mundial". Jordi Casals, pula sue parte, splicou que trazer l'Argentina custa pouco más de 1 milhon d'ouros, mas nun dubida que "se l stádio s'anche, la recuperaremos i, anclusibe, teneremos lhucro".
Xavier Venyals, persidente de la Plataforma, assistiu l cerimónia donde la Plataforma bestiu l sou logotipo an dambos ls cartazes comemoratibos de l jogo, cumo an l'eimaige de l painel atrás de pessonalidades que falórun. Ua demostraçon de l buon sentimiento qu'eijiste antre las dues antidades.
Fuonte: www.seleccions.cat
