Ls que teneis un lhápeç a la mano fazei ua ruodra an buolta de l die 9 de Junho de 2009, que bai a ser un die amportante pa la stória de la nuossa lhéngua.
Albertina de São Pedro i Luís Silva ban a fazer (AN LHÉNGUA MIRANDESA) l Júri de Certeficaçon de l sou Porcesso RVCC (Recunhecimiento, (V)Balidaçon i Certeficaçon de Cumpeténcias ne l CNO (Centro Nuobas Ouportunidades) de l Anstituto Piaget, an Macedo de Cabaleiros, que le dará dreito a un certeficado d'habelitaçones, pa to ls eifeitos, eiquibaliente al 9º anho. L júri será ourientado pul porsor Amadeu Ferreira, que you çcunfio que ye un tiu de que bós yá oubistes falar.
Pus claro que queda tod'mundo cumbidado, diç que yá somos tan poucos, mal será que se encha la casa!...
L Porcesso RVCC ye ua de las maneiras de las pessonas tenéren un certeficado ó diploma drento de las Nuobas Ouportunidades. Trata-se de zambolber un portefólio, adonde quéden spelhadas las bidas de las pessonas: l que bibírun, l que daprendírun, l que sáben fazer, pa que le poderá serbir i cumo poderán alhargar esses saberes. L porcesso acaba-se cul Júri de Certeficaçon, adonde esses trabalhos son apersentados. Quien quejir saber mais, puode antrar, cumo tal, eiqui.
Yá miles de pessonas fazírun este porcesso, mas la nuobidade cun Albertina i Luís ye que l sou porcesso fui todo zambolbido an lhéngua mirandesa, l sou portefólio stá todo screbido an Mirandés i l sou Júri de Certeficaçon tamien bai a ser an mirandés, de maneira que se puode dezir que ye l purmeiro certeficado/diploma passado pul sistema d'ansino pertués tenendo cumo sustentaçon solo la lhéngua mirandesa, ó, dezido dua maneira mais simples, Albertina i Luís fazírun l nono anho an Mirandés!
I peç-me que nun será abuso dezir que, p'alhá de la certeficaçon de las pessonas, tamien ye l mirandés quien bai a ser certeficado, cumo lhéngua de tanto balor cumo las outras, seia pa l que fur, seia pa cerrar l portielho, seia pa ir a la scuola.
Fui un porcesso lhargo, hai mais d'un anho q'ándan nisto (quando hai quien faga l porcesso an 2/3 meses) i hai que dar ls parabienes a quien ls merece: a la ANQ (Agéncia Nacional pa la Qualificaçon, que ye la chefa de todo l que respeita a las Nuobas Ouportunidades), que tubo la coraige d'outorizar este porcesso; al Anstituto Piaget, por haber apostado ne l mirandés i saber andar delantre de ls outros ne l que respeita a zambolbimiento i ansino; i, an special, a Albertina i a Luís, estes dous “boubicos” mirandeses, por habéren puosto de pies mais este “menhir” ne l camino yá tan lhargo de l mirandés, sien miedo que l cielo le caíra anriba de la cabeça!
Ah, i yá se me iba squecendo de l más amportante: Albertina i Luís son de San Pedro, bandita tierra que bota assi fruitos destes, quando ls outros ban cun l trigo, yá eilhes bénen cun la farina.
